Токтогул районунун тургуну карышкырды тирүүлөй кармап алды

Токтогул районундагы Үч-Терек айыл өкмөтүнө караштуу Саргата айылынын 32 жаштагы тургуну Жумадил Таңатаров 30-мартта карышкырды тирүүлөй кармап алды. Бул тууралуу карышкыр кармаган жаран 31-мартта SUPER.KG порталына өзү кабарлады.

“Кечээ саат 14:00 чамасында айылдын жогору жагында ойноп жүргөн балдар “карышкыр көрдүк” дешкенинен алар көрсөткөн тарапка бет алдым. Карышкырлар кошунамдын 2 козусун көтөрүп кетишкен экен. Артынан издери менен кууп барып, Орток деген тоонун бетинен жеттим. 3 карышкыр 1 козуну жеп жаткан экен. Экөө мени көрүп качып кетти, бирөөнү болсо 2 итим барып куйруктап калганда, мен союл менен башка чапсам эсин жоготту. Тумшугун зым менен байлап, айылга сүйрөтүп келип байлап койдум. Экологдор карышкырды келип көрүшүп, “Жалал-Абад шаарына алып кетебиз” деп кетишти. Зоопаркка алып барышабы же ветеринардык текшерүүдөн өткөрүшөбү билбейм”,- дейт ал.