“Рио-де-Жанейро-2016” Олимпиадасынын билеттери сатыла баштады

“Рио-де-Жанейро-2016” Жайкы Олимпиадасынын билеттери сатыла баштады. Бул тууралуу Олимпиаданын Аткаруу комитетине шилтеме берүү менен чет элдик маалымат булактары жазып чыгышты.

Маалыматка ылайык, билеттер сатыкка 1-апрелден тарта коюлган. Бразилиянын ар бир жараны билет алуу үчүн арыз бере алат. Ал эми башка өлкөлөрдүн жарандары үчүн билеттер ошол өлкөдөгү Олимпиада комитети аркылуу алынат. Дүйнө жүзү боюнча аталган оюндарга карата сатыла турган билеттердин саны 7,5 миллионго чейин жетет. Ал эми орточо баасы 40 реалдан (800 сомго жакын) 1200 реалга чейин (22 миң сомдой). Ачылыш аземине кирүүгө мүмкүнчүлүк берген билеттин баасы баарынан кымбат болуп, 4,6 миң реалды түзөт (85 миң сомдон ашык).

Кошумчалай кетсек, Олимпиада оюндары Бразилиянын Рио-де-Жанейро шаарында 5-августта старт алып, 21-августта жыйынтыкталат.