Жогорку Кеңештин айым депутаттары Ботаникалык бакчаны коргоо маселесин талкуулашты

Жогорку Кеңештин Аял депутаттар форумунун 2-апрелдеги жыйынында Улуттук илимдер академиясына караштуу Ботаникалык бакчаны сактоо жана Баткен жергесинде өскөн айгүл гүлүн коргоо маселеси каралды.

"Кыргыз парламентинин айым депутаттары бир жыл аралыгында Ботаникалык бакчанын абалы менен беш жолу барып таанышты. Депутаттардын тармактык комитет менен биргелешкен аракети аркылуу 2015-жылдын 1-апрелинде “Улуттук илимдер академиясынын Тил жана адабият институтунун Кол жазмалар фондунун жана Ботаникалык бакчанын абалы жөнүндө” Жогорку Кеңештин токтому кабыл алынды",- деди депутат Айнуру Алтыбаева.

Ботаникалык бакчанын директору Туратбек Мүсүралиев: "Токтомдун кабыл алынышы акыркы 20 жыл аралыгындагы алгачкы жардам болду. 150 гектар аянтта жайгашкан бакчада 5 миңден ашуун сейрек кездешүүчү өсүмдүктөрдүн түрлөрү бар, каражаттын жетишсиздигинен улам алар таптакыр каралбай калган",- деп билдирди.

Жыйында Ботаникалык бакчанын илимий жактан гана эмес, экологиялык жактан да мааниси зор экени, аны коргоп гана калбастан, андан ары өнүктүрүү керектиги тууралуу пикирлер айтылганын парламенттин маалымат кызматы билдирди.