Ошто студенттер түрдүү кырсыктардан сактануу боюнча сабак алышты

Ош гуманитардык-педагогикалык институтунун колледжинин студенттери өзгөчө кырдаалдар мезгилиндеги жашоо коопсуздугу боюнча атайын адистерден практикалык сабак алышты.

Окуу жайдан кабарлашкандай, бул иш-чара Коопсуздук күнүнө карата уюштурулууда. Анда студенттер теориялык жактан гана билим албастан, өрт учурунда, сел келген мезгилде, көчкү жүргөн жайларда коопсуздук чараларын колдонуу, сактануу жана биринчи жардам көрсөтүүнү үйрөнүштү. Анда атайын ӨКМнын Өрт өчүрүү кызматынын кызматкерлери, куткаруучулар жана медициналык кызматкерлер келип, практика жүзүндө көрсөтүштү.

Иш-чаранын жүрүшүндө атайын жасалма абал уюштурулду. Сценарий боюнча имараттардын биринен өрт чыгып, анда бир нече жаран калып калган көрүнүш жасалган. Аны өчүрүү үчүн өрт өчүрүүчүлөрдү жана медициналык "Тез жардам" кызматын чакырышат. Алар келип, жабыр тарткан жарандарга биринчи жардамын көргөзүп, өрттү өз убагында өчүрүп калышты. Мындай жасалма абал окуяны атайын студенттер көрүп үйрөнүүсү үчүн уюштурулду.