“Ош бажы” командасы волейбол боюнча Улуттук Лиганын чемпиондугун камсыздады

“Ош бажы” командасы волейбол боюнча Улуттук Лиганы экинчи ирет катары менен утуп алды. КРнын Волейбол федерациясынан кабарлашкандай, 2-апрелде лиганын акыркы турундагы оюндар болду.

Оштун клубу чемпиондукту Ысык-Көл облусунун “Жаңы муун” командасы менен талашмак. Бирок Ысык-Көлдүн командасы бул күнү “Жаш күч” командасына утулуп (1:3), чемпиондук жарыштан чыгып калды.

Жыйынтыгында “Ош бажы” клубу карамагындагы 25 упай менен чемпиондукту камсыздады. Бул команда акыркы оюндарын уттуруп жиберсе да, чемпиондукту колдон чыгарбайт. Ал эми 2-орундагы “Жаңы муун” командасынын эсебинде 22 упай бар.

Кошумчалай кетсек, волейбол боюнча Улуттук Лига 7-ирет өтүп жатат. Буга чейин 5 ирет “Салам-Алик” командасы чемпион аталса, акыркы 2 жылда Оштун командасы баш байгени багындырып келет.