Кыргыз тилин өнүктүрүү жана тил саясатын өркүндөтүү боюнча меморандумга кол коюлду

Кыргыз Республикасынын Президентине караштуу Мамлекеттик башкаруу академиясынын ректору Алмаз Насыров менен Кыргыз Республикасынын Президентине караштуу Мамлекеттик тил боюнча улуттук комиссиянын төрагасы Эгемберди Эрматов мамлекеттик тилди өнүктүрүү жана тил саясатын өркүндөтүү боюнча меморандумга кол коюшту. Бул тууралуу бүгүн, 3-апрелде Башкаруу академиясынын басма сөз кызматынан билдиришти. 

Маалыматка ылайык, меморандум «КРнын 2014-2020-жылдары мамлекеттик тилди өнүктүрүү жана тил саясатын өркүндөтүү боюнча чаралар жөнүндө» жарлыгын иш жүзүнө ашыруу максатында иштелип чыкты. Меморандум кол коюлган күндөн тартып 12 ай күчүндө болот.

Биргелешип иштөө төмөндөгү багыттарды өзүнө камтыйт:

- КРда мамлекеттик тилди өнүктүрүү жана тил саясатын өркүндөтүү боюнча чараларды ишке ашырууга;

- КРда элдин биримдигин жана этностор аралык мамилелерди чыңдоо боюнча концепцияны иш жүзүнө ашырууда биргелешкен аракеттерди көрүүгө;

- көп улуттуу элдердин арасында кыргыз тилинин кадыр-баркын жогорулатуу менен бирге анын улуттарды бириктирүүчү тил катары даражасын көтөрүү;

- мамлекеттик тилди коомдук турмуштун бардык чөйрөлөрүндө толук жана кенен колдонууга;

- мамлекеттик тилди кесиптик билим берүүдө жана иш кагаздарын жүргүзүү системинде тереңдетүү жана кеңейтүү;

- окуу китептерин иштеп чыгарууда алардын ченемдик-усулдук негиздерин түзүү.