Футбол боюнча Испания чемпиондугунда "Реал" атаандашын 9:1 эсебинде утту, 5 голду Криштиану Роналду киргизди

"Реал" - "Гранада" - 9:1

Голдор: Бэйл (25-мүнөттө), К.Роналду (30, 36, 38, 54, 90), Бензема (52,  56), Ибаньес (74), Майнц (83, өз дарбазасына. 

Бүгүн, 5-апрелде футбол боюнча Испания чемпиондугунун 29-турунда "Реал" клубу өз стадионунда "Гранада" клубу менен кез келди. Оюнда 10 гол кирип, мадриддик клуб атаандашын 9:1 эсебинде утуп алды. Алгачкы гол 25-мүнөттө киргенин эске алсак, бул оюнда 10 гол кирет деген ой көптөрдө болгон эмес.

Бул жеңиши менен 3 упай алган "Реал" Испания биринчилигинде быйылкы сезондогу упайларынын санын 67ге жеткирип, дагы да болсо 2-орунду ээлеп келүүдө. Карамагындагы 68 упай менен 1-орунду ээлеп турган "Барселона" 29-турдагы оюнун "Сельта" клубуна каршы ойнойт.  

Карьерасында алгачкы ирет 5 гол киргизген Криштиану Роналду бомбардирлер тизмесинде "Барселонанын" чабуулчусу Лионель Мессиден кайрадан 4 голго ашып кетти. Бомбардирлердин алдынкы ондугу төмөнкүчө: 

36 гол - Криштиану Роналду ("Реал")

32 гол - Лионель Месси ("Барселона")

17 гол - Карлос Бакка ("Севилья"), Неймар ("Барселона")

16 гол - Альберто Буэно ("Райо Вальекано")

15 гол - Карим Бензема ("Реал")

14 гол - Антуан Гризманн ("Атлетико")

13 гол - Гарет Бэйл ("Реал")

12 гол - Марио Манджукич ("Атлетико"), Лусиано Вьетто ("Вильярреал")