Жалал-Абад. Согуш ардагерлери менен мектеп окуучулары "Нооруз" эс алуу багына мөмө дарактарынын көчөттөрүн отургузушту

Жалал-Абад шаарында өмүр кечирип жатышкан согуш ардагерлери менен бирдикте мектеп окуучулары "Нооруз" эс алуу багына мөмө берүүчү дарактардын көчөттөрүн отургузуу иш-чарасын өткөрүштү. Бул тууралуу бүгүн, 7-апрелде Жалал-Абад шаарынын мэриясынын басма сөз кызматынан билдиришти. Маалыматка караганда, республика боюнча Улуу Ата Мекендик согуштун катышуучуларына арналган "Түбөлүктүүлүктүн жана жашоонун урматына" деген акциянын алкагында Улуу Жеңиштин 70 жылдыгына 70 мөмөлүү дарак отургузууга 10дон ашуун ардагер катышты. 

"Бир бак кыйылса, ордуна жок дегенде 10 дарак отургузуу керек" дегендей, акыркы убактарда айлананы жашылдандыруу жана көрктөндүрүү иштери колго алынбай жатканы байкалууда",- дейт Улуу Ата Мекендик согуштун ардагери Мухаммед Маматибраимов.