Нарын шаарында Апрель революциясынын 5 жылдыгына карата курман болгондорду эскерүү митинги өттү

Кечээ, 6-апрелде Нарын шаарында 7-Апрель - Элдик революция күнүнө карата курман болгондорду эскерүү митинги болуп өттү. Мэриядан кабарлашкандай, шаардагы “Тянь-Шань” сейил багында таң эрте муңдуу комуз күүлөрү жаңырып, Апрель баатырларына арналып тургузулган эстелик астына шаар, облус жетекчилигинин жана коомчулуктун өкүлдөрү гүлчамбарларды коюшту. Андан соң курман болгон баатырлардын арбагына куран окулду. Иш-чаранын жүрүшүндө маданият кызматкерлери тарабынан атайын Апрель революциясынын 5 жылдыгына карата даярдалган, кырчындай болгон жаш баланын бейкүнөө окко учкандыгы, анын жакындарынын көз жашы алигиче кургай электигин чагылдырган учурдан үзүндү көрсөтүлдү.

Кошумчалай кетсек, Нарын шаардык мэриясы тарабынан иш-чараны уюштуруп, өткөрүү үчүн жергиликтүү бюджеттин эсебинен 80 миң сом акча каражаты бөлүнүп берилген. Мунун ичинен 42 миң сому Апрель элдик революциясында кайтыш болгондордун үй-бүлөлөрүнө, жаракат алгандарга, активдүү катышуучуларына материалдык колдоо иретинде жумшалды.