Эксперт жарандарды коомдук тамактануучу жайлардан сапат сертификатын сурагандан уялбоого чакырат

"Жөнөкөй жаран болосуздарбы же мамлекеттик чиновник болосуздарбы, коомдук тамактануучу жайлардан сапат сертификатын сурагандан уялбаңыздар". Бул тууралуу бүгүн, 8-апрелде маалымат жыйын учурунда КРнын Базар, ишкерлер, соода жана тейлөө кызамат көрсөтүүчүлөр ассоциациясынын президенти Сергей Понамарёв билдирди. Анын айтымында, эшектин этине байланышкан ызы-чуу коомдук тамактануучу жайлардын рейтингин бир кыйла түшүрдү.

“Учурда жарандарыбыз койдун, уйдун этин алып жегенден чочуп калышты, мунун айынан тоок эти азыр өтө жакшы сатылууда. Кээ бир тамак-аш саткан жерлер чыгымга учурап жатышат. Эгер күмөн санап жатсаңыз, эттин сапатына болгон сертификатты сурагандан тартынбаңыз. Биздин өлкө экологиялык таза эт азыктарына бай мамлекет катары таанылып келет, эми минтип желбей калган абалга туш болуп отурабыз”,- деди Понамарёв.