Ошто “Жылдын мыкты мугалими-2015” сынагынын экинчи баскычы өтүүдө

6-10-апрель күндөрү Ош шаарындагы мектептердин мугалимдери “Жылдын мыкты мугалими-2015” сынагынын экинчи баскычына катышып, күч сынашууда. Бул тууралуу Ош шаардык билим берүү башкармалыгынан кабарлашты.   

Маалыматка ылайык, сынактын экинчи баскычында белгиленген жобо боюнча, мугалимдин сабак учурунда жана сабактан тышкаркы мезгилде окуучулар менен иш алып баруусу видеотүрмөк аркылуу көрсөтүлөт. Мугалимдик ишмердүүлүгүн камтыган портфолио тапшырылып, ага кошумча “Менин педагогикалык философиям” деген темада эссе жазуусу милдеттендирилген.

Аталган сынактын негизги максаты жумушуна чыгармачылык менен мамиле кылган, таланттуу мугалимдерди табуу жана аларга колдоо көрсөтүү менен мугалимдик кесиптин кадыр-баркын көтөрүү, коомдун аң-сезиминде мугалимдин позитивдүү образын түзүү болуп саналат. Ошондой эле педагогикалык кызматкерлердин билим берүүнүн мазмунун жаңылоодогу чыгармачыл ишмердүүлүгүн өнүктүрүү, билим берүүдөгү жаңы технологияларды колдонууну жайылтуу максатын көздөйт. “Жылдын мыкты мугалими-2015” сынагы Ош шаарында 4 баскыч менен өткөрүлүп, жеңүүчү аталган мугалим республикалык сынакка катышууга жолдомо алат.