Москванын аймагында кыргыз мигранттары үчүн документтерди кабыл алуучу бөлүм ачылды

Орусиянын Москва шаарына жакын аймакта жайгашкан "Сахарово" миграциялык борборунда кыргыз мигранттары үчүн документтерди кабыл алуучу бирдиктүү бөлүм ачылды. Бул тууралуу бүгүн, 10-апрелде Эмгек, миграция жана жаштар министрлигинин басма сөз кызматы билдирди.

Маалыматка ылайык, буга чейин жумушчу мигранттар уруксат берүүчү документтерди алууда кыйынчылыктарга кезигип келишкен. "Мындан улам Кыргыз Республикасынын жумушчулары кезекти көп күтпөсүн деген ой менен орус тарап аталган борбордун кызматкерлеринин иш тартибин өзгөртүү боюнча чечимге келди", - деп билдирет мекеме.

Мындан тышкары министрлик патент алууда күтүү мөөнөтүн кыскартыш үчүн Москва облусунун Красногорск районунда дагы бир борбор ачылганын баса белгиледи.

"9-майдан тарта кыргыз жарандарынын эмгегин документтештирүүнү Евразиялык экономикалык союздун бардык мүчө мамлекеттеринде (Беларусь, Орусия, Казакстан, Армения, Кыргыз Республикасы) алып салуу күтүлүүдө. Ошентип, кыргыз мигранттары үчүн патент алуу зарылчылыгы толугу менен жоюлат",- деп кошумчалашты министрликтен.