Өлкөдө Балдарды коргоо борборлорун ачуу боюнча кайрымдуулук кампаниясы башталды

Өлкөдө Балдарды коргоо борборлорун ачуу боюнча кайрымдуулук кампаниясы башталды. Бул тууралуу бүгүн, 13-апрелде маалымат жыйынында “Жарандык укуктук союзу” коомдук бирикмесинин директору Гүлжан Байбетова билдирди. Анын айтымында, бүгүнкү күндөн тартып республика боюнча демөөрчүлөрдүн жана айыл өкмөттөрдүн жардамы менен жер-жерлерде Балдарды коргоо боюнча кампания башталды.

“Өкмөттүн деңгээлинде жаш балдарга юридикалык, социалдык, психологиялык жактан акысыз консультация берүү мүмкүнчүлүгү азыр Бишкек, Каракол шаарларында жана Түп айылында гана бар. Жергебиздин ар бир аймагында ушундай мекемелер ачылса деген оюбуз бар. Анткени балдарга көрсөтүлүп жаткан зордук-зомбулук күндөн-күнгө көбөйүүдө. Бул маселени коомдун ар бир атуулу жапа тырмак киришип, бирге чечүү керек. Айыл өкмөттөрү турак жай бөлүп беришсе, ал эми ишкерлер каражат жагынан кол кабыш кылышса, иш алдыга жылат деп ойлобуз”,- деди Байбетова.