Өлкөдө эмгек акы былтыркыга салыштырмалуу 8,8 пайызга өскөн

Быйылкы жылдын январь-февралындагы бир кызматкердин орточо айлык номиналдык эмгек акысы (чакан ишканаларды кошпогондо) 11 696 сомду түзүп, өткөн жылдын январь-февралына салыштырганда 8,8 пайызга жогорулады. Бул тууралуу Улуттук статистикалык комитетинин эмгек жана иш менен камсыз кылуу бөлүмүнүн башчысы Гүлнара Жайлообаева билдирди. Анын айтымында, керектөө бааларынын эсеби менен эсептелип чыгарылган реалдуу көлөм, тескерисинче, 2,2 пайызга төмөндөгөн.    

“КРнын Улуттук банкы тарабынан аныкталган расмий курстун натыйжасында 2015-жылдын январь-февралында бир кызматкердин орточо айлык номиналдык эмгек акысы 194,5 АКШ долларын түздү. Эмгек акыны төлөө боюнча жалпы карыздын суммасы 2015-жылдын 1-мартына карата жалпы республика боюнча 301 миллион сомду түздү жана өткөн жылдын ушул күнүнө салыштырганда 13,5 пайызга жогорулады”,- деди адис.