Ош шаарында бүтүрүүчү класстын 49 окуучусу кызыл аттестат алууга талапкер болууда

Ош шаардык билим берүү башкармалыгына караштуу мектептердин бүтүрүүчү класстарынан 49 окуучу өзгөчө үлгүдөгү (кызыл) аттестат алууга талапкер болду. Бул үчүн 10-11-класста окуган чейректик, жылдык баалары жалаң "5" болуп, коомдук иштерге жигердүү катышуусу эске алынган.

Шаардык билим берүү башкармалыгынан кабарлашкандай, бүтүрүүчү класстын окуучулары ушул жылдын май айында КРнын Билим берүү жана илим министрлиги тарабынан бекитилген 4 сабактан сынак тапшырышат. Сынактан эң жогорку баа алган окуучулар кызыл аттестат алуу укугуна ээ болушат.

Ал эми 9-классты бүтүргөндүгү тууралуу күбөлүктүн өзгөчө үлгүдөгүсүн алуу үчүн 70 окуучу талапкер болду. Эске салсак, былтыркы окуу жылында Ош шаарындагы мамлекеттик мектептердеги бүтүрүүчү класстын 10 окуучусу өзгөчө үлгүдөгү аттестат алган.