Ош шаарында жалпы республикалык тестирлөөгө катышуу үчүн 2457 абитуриент катталды

Ош шаардык билим берүү башкармалыгына караштуу мектептердин бүтүрүүчү класстарынан 1797 окуучу жана кесиптик окуу жайлардын, колледждердин, техникумдардын акыркы курстарынан 660 окуучу жалпы республикалык тестирлөөгө катышуу укугун алды. Аталган башкармалыктан кабарлашкандай, тестирлөөгө каттоо ушул жылдын 24-февралынан 7-апрелине чейин жүрдү. Ал эми катталбай калган абитуриенттер 18-майда каттала алышат. Билим берүү жана илим министрлиги тарабынан 2015-жылы жогорку окуу жайлардагы гранттык орундарга жана контракттык негиздеги окутуу формаларына (күндүзгү, сырттан окуу жана кечки) тапшыруу үчүн жалпы республикалык тестирлөөнүн жыйынтыгы милдеттүү деп чечим кабыл алынгандыктан, ЖОЖго тапшырууну каалаган ар бир бүтүрүүчү тестирлөөгө катышуусу шарт.

Жалпы республикалык тестирлөө республика боюнча 19-22-май күндөрү жүргүзүлөт.