ЭлТРдин кызматкери: "Жетекчи Максуда Айтиева менин ордума маданиятсыз баланы продюсер кылып койду"

"Телеканалдын аталышы өзгөртүлүп, ЭлТР катары 10 жылдан бери иштеп келе жатат, жамаатта эч качан интрига деген нерсе болгон эмес". Бул тууралуу бүгүн, 16-апрелде маалымат жыйында аталган телеканалдын кызматкери Аида Шекенова билдирди. Анын айтымында, жаңы жетекчи Максуда Айтиеванын келиши менен эмгек акы 10-15 күнгө кечиктирилип берилүүдө.

“Көптөгөн программалар токтотулду, тажрыйбасы жок, кыргызча чала сүйлөгөн кабарчылар алынды. Менин ордума башка бир баланы маданият бөлүмүнүн продюсери кылып койду. Ал журналист кыздарга кыйкырып мамиле жасайт. Бул маданияттуулукпу? 

Биз жетекчиге талап коюп, алар аткарылбаса иш таштай турганыбызды билдиргенбиз. Бирок президенттик аппараттын басма сөз кызматынын жетекчиси Алмаз Үсөнов маселе 2-3 күндүн ичинде чечилерин айтты, буга байланыштуу иш таштоого баруудан баш тарттык”,- деди журналист.

Телеканалдын жетекчиси Максуда Айтиева айлыктардын кечиктирилиши тууралуу 15-апрелде SUPER.KG порталына буларды айткан: "Ооба, февраль айында кызматкерлердин айлыгын берүү кечиктирилген. Мунун себеби мындай: Санариптик берүүгө өткөрүү талабы бар, анын алкагында биздин каналга 10 миллион сом каралган. Ал акчанын баары Оштогу студияга жумшалды. Бишкекте да студиябыз бар, ага да 5 миллион сом жумшоого туура келди. Ошондуктан кечиктирилди. Ал эми март айынын маянасы өз убагында берилди. Апрель айыныкы даяр, өз учурунда берилет". 

Ушул эле маалымат жыйынында телеканалдын жетекчисинин орун басары Бейшенбек Бекешов жетекчи Максуда Айтиеванын коррупцияга малынганын айтты. "ЭлТРдин Жаңы жылдагы концерттик программасын коммерциялык негизде уюштурам деп ырчылардан жана концертке келген меймандардан 350-400 миң сом акча жыйнаткан. Анын бир тыйыны да кассага түшкөн эмес. Иштегендердин ар бирине 2 миң сомдон, баш-аягы 60-70 миң сом таратып берген. Калган акчанын эмне болгонун бухгалтерия да, коммерциялык бөлүм да, чарбалык бөлүм да, чыгармачыл жамаат да билбейт. Каналдын атайын эсебине өткөн жылы январда эле 400 миллион сом түшсө, быйыл 1-кварталдын үч айы биригип 2 миллион сом түштү. Кызматкерлер Айтиевага чейин алып турган премия дегендер биротоло токтоду”,- деп кошумчалады Б.Бекешов.