“Баткен эркин экономикалык аймагы жөнүндө” мыйзам долбоору сунушталды

Жогорку Кеңештин 16-апрелдеги жыйынында "Баткен эркин экономикалык аймагы жөнүндө" мыйзам долбоору каралды. Демилгечилердин билдиришинче, мыйзам долбоору Баткен облусунун Баткен, Сүлүктү шаарларын, Баткен жана Лейлек райондорун социалдык-экономикалык жактан өнүктүрүүгө көмөктөшүү үчүн иштелип чыкты. Баткен ЭЭАны түзүү аймакка инвестиция тартуу боюнча жакшы мүмкүндүк берери айтылды.

Баткен ЭЭАны түзүү жана толук иштеши ар түрдүү даражада төмөнкүлөргө көмөктөшөт:

- жаңы өндүрүштүк ишканаларды жана башка чарбалык жайларды ачууга;

- чек арага жакын аймактарда калкты иш менен камсыз кылууга;

- жергиликтүү калктын турмуш деңгээлин жогорулатуу аркылуу аны кармап калууга;

- аймактын экспорттук потенциалын жогорулатууга;

- товар жүгүртүүнү арттырууга;

- атаандаш аймактык экономиканы, инфраструктураны жандандырууга, экономиканын аймактык кластерлерин өнүктүрүүгө.

Мыйзамдын долбоору 1-окууда добуш берүүгө жиберилди.