Бишкекте жарнамалардын туура жазылышы боюнча жыйын өттү

КРнын Президентине караштуу Мамлекеттик тил боюнча улуттук комиссия көрнөк-жарнак маселелери боюнча жыйын өткөрдү. Жыйынга КРнын Президентине караштуу Мамлекеттик тил боюнча улуттук комиссиянын төрагасынын орун басары Медербек Аким уулу, Мамлекеттик тил боюнча улуттук комиссиянын котормо бөлүмүнүн кызматкерлери жана Бишкек шаардык мэриясынын мамлекеттик тилди өнүктүрүү бөлүмүнүн башкы адиси, Бишкек шаарынын 4 районунун тил адистери, райондук соода бөлүмдөрүнүн жетекчилери, Бишкек шаардык монополияга каршы күрөш кызматынын өкүлдөрү катышып, жарнама маселелери боюнча сүйлөшүү жүрдү. Мамлекеттик тил боюнча улуттук комиссиянын котормо бөлүмүнүн жетектөөчү адиси Б.Айтиевдин билдирүүсүнө караганда, сырткы жарнамалар тартипке келип калды. Ал эми ички көрнөктөр көйгөй жаратууда. Өзгөчө соода борборлорунун ичиндеги жазуу-сызуулар мыйзамга туура келбеген учур көп болуп жатканын билдирип, жөнгө салуу иштерин чогуу жүргүзүүгө чакырды.