Казакстандагы жол кырсыгынан каза тапкан 5 адамдын сөөгү кыргыз жерине алынып келинди

Казакстандагы жол кырсыгынан каза тапкан 5 адамдын сөөгү кыргыз жерине алынып келинди. Бул тууралуу бүгүн, 21-апрелде ӨКМнын басма сөз кызматы билдирди.

Маалыматка караганда, кечээ, 20-апрелде Рахимжан Оринбаев туугандары менен биргеликте Жамбыл облусуна барып, жол кырсыгынан каза тапкан Оринбаев Аббас (2008-жылы туулган), Оринбаев Аброриддин (2006-жылы туулган), Оринбаева Хадичахон (2003-жылы туулган), Оринбаева Гавхарай (1981-жылы туулган) жана Оринбаева Мавжуданын (1953-жылы туулган) сөөктөрүн алып келген. Ал эми калган кыргыз жарандарынын сөөктөрүн алып келүү иштери жүрүүдө.

Айта кетсек, 19-апрель күнү саат 09:47 чамасында Жамбыл облусунун Моюнкум районунда жол кырсыгы болуп, анын кесепетинен 15 кыргыз жараны каза таап, төртөө жабыркаган. Анда Мерседес-Бенц Спринтер унаасы менен Газель-2705 үлгүсүндөгү унаа сүзүшкөн. Биринчи унаанын ичинде 19 кыргыз жараны болгон.