Нарындык 2 окуучу илим жаатында өзгөчөлүк жаратып, Казакстанда өткөн олимпиадада 1-орунду ээлешти

Казакстанда 30 өлкөдөн келген 308 окуучунун катышуусунда эл аралык долбоор боюнча "Infomatrix" олимпиадасы болуп өттү. Бул олимпиадага кыргыз өлкөсүнүн желеги астында катышкан 2 окуучу өзүлөрү ойлоп тапкан мультифункционалдык сызгыч анимациясын көргөзүп, 1-орунду ээлешти. Бул тууралуу SUPER.KG порталына Нарын шаарындагы Кыргыз-Түрк лицейинен билдиришти.

Маалыматка ылайык, байгелүү кайткан кыргыз окуучулары - Нарын шаарындагы Кыргыз-Түрк лицейинин 10-классынын окуучулары Теңирбек Карыпжумаев менен Нурсултан Шакиров. Алар сызгыч менен циркулдун аткарган кызматтарын бириктирип, түрдүү геометриялык фигураларды сызууга ылайыктуу сызгыч ойлоп табышкан. Бул ойлоп табуудан кийин циркулдар аз колдонулуп, анын ордуна дал ушундай сызгычтар колдонула баштайт деген божомол айтышты комиссиянын мүчөлөрү. Алар илим тармагында мындай ачылыш алгачкы жолу катталганын да кошумчалашкан.