Ош. Окуучулар арасында өткөн “Жаш жол инспектору” сынагынын жеңүүчүлөрү аныкталды

Бүгүн, 21-апрелде Ош шаарында окуучулар арасында өткөн “Жаш жол инспектору” сынагы жыйынтыкталды. Анда Жолон Мамытов атындагы мектептин окуучуларынан түзүлгөн команда жеңүүчү болуп, май айында Бишкек шаарында өтүүчү республикалык баскычка катышууга жолдомо алды. Шаардык билим берүү башкармалыгынан кабарлашкандай, 2-орунду №50-мектеп, 3-орунду №27-мектептин окуучулары багындырышты.  

Сынакка шаардагы мектептерден жалпы 11 команда катышып, жолдо жүрүүнүн эрежелерин сахналаштырып көрсөтүп, адистер тарабынан берилген суроолорго жооп берүү менен ат салышты. Жеңүүчүлөргө Ош шаардык ички иштер башкармалыгынын жол-кайгуул бөлүмүнүн кубогу, грамоталар тапшырылды. Сынактын негизги максаты шаардагы окуучуларга жолдо жүрүүнүн эрежелерин үйрөтүү жана аны сактоого көндүрүү болуп саналат.