Бишкекте окумуштуу-педагог Сатыбалды Нааматовдун 110 жылдыгына карата тегерек стол уюштурулду

КРнын Президентине караштуу Мамлекеттик башкаруу академиясында кыргыздын чыгаан окумуштуусу, педагог, агартуучу Сатыбалды Нааматовдун 110 жылдык мааракесин өткөрүү максатында "Тарыхта өчпөс из калтырган инсан" деген темада тегерек стол уюштурулду. Бул тууралуу окуу жайдан билдиришти. Маалыматка караганда, тегерек столду Тилдерди үйрөтүү борборунун директору Калипа Өмүралиева ачып берди. Ал кыргыз мамлекетин түптөгөн инсандар тууралуу сөз сүйлөп, алардын эмгегин унутпоо керектигин жана тарыхыбызды биле жүрүүбүз зарыл экенин билдирди.

"Биз өткөн тарыхыбызды түптөгөн улуу инсандарыбызды билишибиз керек. Өзгөчө жаштарга булар тууралуу айтып, ушул сыяктуу тегерек стол, жолугушууларды уюштуруп, тарыхка из калтырган адамдардын өмүр баян, басып өткөн жолу тууралуу маалымат беришибиз кажет. Жакында академиянын ичине белгилүү инсандар тууралуу стенд даярдаганы турабыз",- деди Өмүралиева.

Кийинки сөз агартуучу Сатыбалды Нааматовдун небереси Оңолкан Уманкуловага берилди. Ал чоң таятасынын чыгармачылык эмгектери, үй-бүлөсү жана кыргыз эли үчүн жасаган агартуучулук иштерине токтолду.

Кыргыз Республикасынын Илимдер академиясынын окумуштуусу, тарых илимдеринин кандидаты Жумагул Байдилдеев репрессия убагында курман болгон кыргыз мамлекетинин түптөлүшүнө салым кошкон инсандар тууралуу маалымат берди.

Тегерек столдун жыйынтыгында Тилдерди үйрөтүү борборунун улук окутуучусу Нуриля Осмонова Сатыбалды Нааматовдун өмүр жолу тууралуу даярдалган студенттердин баяндамаларына кезек берди.