Ош облусунун Өзгөн районунда жаңы мечит ишке кирди

24-апрелде Ош облусунун Өзгөн районуна караштуу Дөң-Булак айыл өкмөтүндө жаңы мечиттин ачылышы болду. Аталган иш-чарага муфтий Максат ажы Токтомушев, Ош облусунун мусулмандарынын казысы Ниязали ажы Арипов, өкмөттүн Ош облусундагы ыйгарым укуктуу өкүлү Сооронбай Жээнбеков, Жогорку Кеңештин депутаттары Мамат Орозбаев, Жыргалбек Самаков жана жергиликтүү жашоочулар катышышты.

Облустук казыяттан кабарлашкандай, мечиттин ачылышы алгач куран окуу менен башталып, муфтий жана облус казысы келген конокторду мечиттин ачылышы менен куттуктап, аны курууга көмөк көрсөткөндөргө ыраазычылык билдиришти. Өкмөттүн облустагы өкүлү Сооронбай Жээнбеков мамлекет тарабынан динге өзгөчө көңүл бурулгандыгын айтып, андыктан ачылган мечиттин динди туура жеткирүүдө, ар түрдүү терс көрүнүштөрдүн алдын алууда орду чоң экендигин белгиледи. Андан соң келген коноктор жергиликтүү жашоочулар менен бирге жума намазын окушту.

Эскерте кетсек, аталган мечитти курууга Сауд Арабиясындагы аалым, доктор Саид аль-Бухарий демөөрчүлүк кылган. Мечит үч кабаттан туруп, 1500 адамга ылайыкташтырылган.