Бишкекте педофилдерге каршы митинг куурчактарды таш бараңга алуу менен өттү

Бүгүн, 28-апрелде Бишкектин Максим Горький атындагы сейил багында педофилдерге каршы тынч митинг өттү. Ага жүзгө чукул адам катышып, милиция кызматкерлери көзөмөлгө алышты. Иш-чара бир катар уюмдардын демилгеси менен уюштурулду. Алардын башкы талабы - педофилдерге карата өлүм жазасын киргизүү. Эгер андай болбосо, анда “Педофилдерди карма да, 100 миң сом сыйлык ал” деген аталыштагы акциясын жүргүзөрүн билдиришти митингчилер. Митингдин катышуучусу Жеңиш Молдокматовдун айтымында, мындай тажрыйба Орусиянын Екатеринбург шаарында жүргүзүлгөн жана анын натыйжасында балдарга карата көрсөтүлгөн зордук-зомбулук учурлары бир топ кыскарган.

"Екатеринбург шаарында коомдук активисттер демөөрчүлөрдү тартып фонд ачышып, 3 миллион рубль өлчөмүндөгү суммага педофилдерди кармашкан. Анын жыйынтыгында 2008-жылы 32 балага карата зордуктоолор катталса, 2009-жылы 19 учур болгон. Эгер парламент балдарга зордук-зомбулук көрсөткөндөргө карата өлүм жазасын киргизбесе, биз ушундай кадамга бармакчыбыз",- деди уюштуруучулардын бири. 

Акция педофилдердин элесин чагылдырган куурчакты таш бараңга алуу менен аяктады.