Иш кагаздарын мамлекеттик тилде жүргүзүүгө үйрөтүүчү семинар-тренингдер Баткенде да уюштурулду

Иш кагаздарын мамлекеттик тилде жүргүзүүгө үйрөтүүчү семинар-тренингдер Баткенде да уюштурулду. Муну КРнын Президентине караштуу Мамлекеттик тил боюнча улуттук комиссиянын басма сөз кызматынан билдиришти. Ага ылайык, мекеменин алдындагы Окуу-маалымат борбору жыл башынан бери жер-жерлерде мамлекеттик жана муниципалдык кызматкерлерди иш кагаздарын кыргыз тилде жүргүзүүгө үйрөтүүчү семинар-тренингдерди өткөрүүдө. Буга чейин аталган семинар Чүй аймагында уюштурулуп келсе, эми кезек алыскы аймактарга келип, Баткен облусунун Кадамжай жана Лейлек райондорунда болду. 

Мамлекеттик тил боюнча улуттук комиссиянын алдындагы Окуу-маалымат борборунун директору Айнура Исманкулованын билдирүүсүнө караганда, окутуу тажрыйбалуу методисттер тарабынан иштелип чыккан иш кагаздарын мамлекеттик тилде жүргүзүүгө үйрөтүүчү заманбап окуу куралдары жана электрондук окуу каражаттарын колдонуу менен өттү. Программада бекитилгендей, 24 сааттык окутуу жүргүзүлүп, Кадамжай районунан катышкан 69 кызматкер жана Лейлек районунан 70 кызматкер тастыктамага ээ болду.