Коргоо министринин милдетин аткаруучу: "Аскердик парад 7-майда эмес, 9-майда өтөт"

Улуу Жеңиштин 70 жылдыгына арналган аскердик парад 7-майда эмес, 9-майда өтөт. Бул тууралуу бүгүн, 29-апрелде маалымат жыйынында коргоо министринин милдетин аткаруучу Абибилла Кудайбердиев билдирди. Анын айтымында, коомчулуктан келип түшкөн сунуштан улам парадды 7-майдан 9-майга жылдыруу чечими кабыл алынды.

“Президент Алмазбек Атамбаев 9-майда аскердик парадды башкарышы керек болчу. Бирок ал 7-10-май күндөрү Орусиянын Москва шаарында болот. Ал жерде параддан тышкары Кыргыз Республикасынын Бажы союзуна кирүү маселеси каралат. Мындан улам КРнын Куралдуу күчтөрүнүн Башкы штабынын башчысы Бишкекте 9-майда өтүүчү парадды жетектейт”,- деди министрдин милдетин аткаруучу.

Кудайбердиевдин айтымында, быйылкы парадга 1500гө жакын аскер кызматкери катышып, 71 аскер техникасы көрсөтүлөт.

“Канттагы Орусиянын аскердик базасынан 70 аскер парадга катышат. Быйыл башка жылдардан айырмаланып, жалпысынан 17 учак көрсөтүлөт, алардын 9у тик учак, 8и учак болот. Орусиядан 1,5 миллиард долларлык аскер техникасы келүүдө. Жаңы аскер техникалары да көрсөтүлөт”,- деп билдирди Кудайбердиев.