Баткенде катуу шамалдан зыянга учураган турак жайлардын ээлерине шиферлер таратылууда

Бүгүн, 29-апрелде КРнын Өзгөчө кырдаалдар министрлиги Лейлек району жана Сүлүктү шаарындагы катуу шамалдан зыянга учураган турак жайлардын ээлерине 695 даана шифер бөлүп берди. Бул тууралуу мекеменин басма сөз кызматынан билдиришти. Маалым болгондой, шиферлер Куткаруучуларды даярдоочу мамлекеттик борборунун 2 КамАЗ автоунаасына жүктөлүп, кечээ, 28-апрелде Баткен облусунун Исфана шаарына  жеткирилген.

Айта кетсек, Баткен облусунун Лейлек районунда жана Сүлүктү шаарында 26-апрелде саат 01:00 чамасында ылдамдыгы секундасына 28 метрге жеткен катуу шамал катталган. Анын кесепетинен 2690 даана асбест шифер жана 66 даана темирден жасалган шифер зыянга учураган, келтирилген материалдык чыгым 1 миллион 633 миң 20 сомду түздү.