Курманбек Дыйканбаев: “ТүркПА түрк тилдүү элдерди бири-бирине жакындатууда өзүн көрсөтө алды”

Бүгүн, 29-апрелде Жогорку Кеңеште Түрк тилдүү мамлекеттердин Парламенттик ассамблеясынын Укуктук маселелер жана эл аралык байланыштар боюнча комиссиясынын IV отуруму өттү. Жыйынга ТүркПАга мүчө өлкөлөр: Азербайжан, Казакстан, Түркия жана кыргыз мамлекетинин парламент өкүлдөрү катышты.

Жогорку Кеңештин депутаты Курманбек Дыйканбаев ТүркПА жүргүзгөн ишинде түрк тилдүү элдердин бири-бирине жакындоосунда таасирдүү натыйжа катары өзүн көрсөтө алганын белгиледи. 

“Ассамблея алкагында түрк тилдүү мамлекеттердин ортосунда саясий, экономикалык, маданий жана башка мамилелердин тамыр жайышына өбөлгө түзүлдү. Жыл сайын биргелешкен күч-аракетибиз аркылуу ТүркПАнын ишмердүүлүгү өркүндөп баратат. ТүркПАга мүчө мамлекеттердин туруктуулугуна жана бакубат жашоосуна салым кошо турган натыйжалуу жана конкреттүү долбоорлор ишке аша турган платформага айланып баратканына чоң маани беребиз”,- дейт депутат.

Комиссиянын IV отурумунда ТүркПАнын курамындагы өлкөлөрдүн шайлоо системи, бул багытта тажрыйба алмашуу, шайлоолорго ТүркПАга мүчө мамлекеттердин байкоочуларынын катышуусун уюштуруу маселелери талкууланды.