Орусиянын Павловск шаарында Улуу Ата Мекендик согушта курман болгон Мамат Баймурзаевдин сөөгү табылды

Орусиянын Пушкин районундагы Павловск шаарындагы Боордоштор көрүстөнүнөн Улуу Ата Мекендик согушта курман болгон Мамат Баймурзаевдин сөөгү табылды. Бул тууралуу депутат Курманбек Осмонов 30-апрелде Жогорку Кеңештин жыйынында билдирип, Мамат Баймурзаевдин жакындарын табуу максатында жалпыга маалымдоо каражаттарында бул маалыматты жарыялоо зарыл экенин белгиледи. Эл өкүлү жакында эле Жогорку Кеңештин депутаты Каныбек Иманалиевдин атасынын согушта курман болгон бир тууган агасынын мүрзөсү да табылганын кошумчалап, буларга токтолду: "Орусия аймагынан азыркыга чейин кыргыз жеринен барып, согушта курман болгон жоокерлердин сөөгү табылууда. Биз Улуу Ата Мекендик согушта курман болгон жоокерлердин сөөгүн издөө иштерин мындан ары да уланта беришибиз керек".

Ал эми депутат Эристина Кочкарова анын дарегине Санкт-Петербург шаарындагы аналитикалык борбордон кыргыз жеринен барып, дайынсыз болуп келген 40 жоокердин аты-жөнү фин тилинен орус тилине которулганы жана алардын өздүгү аныкталганы тууралуу кабар келгенин айтты. "Биз Улуу Ата Мекендик согушта курман болгон ар бир кыргыз жоокеринин дареги аныкталганга чейин издөө иштерин токтотпоого тийишпиз",- дейт Кочкарова.