Улуу Ата Мекендик согуштун ардагерлери курсанттарга башынан өткөргөн окуялардан айтып беришти

Ички иштер министрлигинин Сагын Наматбаев атындагы Борбордук музейинде “Эрдик эч качан унутулбайт” деген аталыштагы иш-чара болуп өттү. Анда Улуу Ата Мекендик согуштун ардагери жана ИИМде согуштан кийинки жылдары кызмат өтөгөн Василий Плесков жана Аспек Мойноков аталар курсанттар үчүн башынан өткөргөн окуяларын айтып беришти. Иш-чараны уюштурган ички иштер министринин биринчи орун басары Нурбай Касымбаевдин айтымында, согуш жылдарынан кийин ИИМдин түзүмүндө жалпысынан 385 ардагер кызмат өтөгөн. Бүгүнкү күндө алардын 35и гана калды.   

Жаш укук коргоочулар муну менен катар Борбордук музейде чогулган согуш жылдарынан калган экспонаттар менен таанышып өтүштү. Музейдин жетектөөчү адиси Гүлмайрам Жаналиеванын айтымында, бул жердеги согуш куралдары, жоокерлердин кийимдери, медалдары жана башка буюмдар 1957-жылдан бери чогултулуп келген, ал эми аталган музей 1962-жылы ачылган.