Советтер Союзунун Баатыры Тукубай Тайгараевдин эстелиги майрамга карата иретке келтирилди

Советтер Союзунун Баатыры Тукубай Тайгараевдин эстелиги майрамга карата иретке келтирилди. Бул тууралуу бүгүн, 30-апрелде Сузак райондук администрациясынан билдиришти. 

Маалым болгондой, Тукубай Тайгараевдин эстелигин орнотуу боюнча Сузак районунун жана Жалал-Абад шаарынын жашоочулары тарабынан демилге көтөрүлүп, былтыр Улуу Жеңиш күнүнө карата тургузулган. Советтер Союзунун Баатырынын эстелиги ушул күнгө чейин кайсы аймакка таандык экени белгисиз бойдон калууда. Тагыраак айтканда, Жалал-Абад шаарынын да, Сузак районунун да карамагына өткөрүп берүү жагы каралбай калган. Аталган мүчүлүштүктөргө карабастан, Сузак райондук администрация башчысы-аким Нурболот Мирзахмедовдун демилгеси менен баатырдын эстелигин Улуу Жеңиштин 70 жылдыгына карата актоо, сырдоо иштери аткарылып, айланасы иретке келтирилди.

Ошону менен катар Сузак районунун аймагындагы окуучулардын арасында биздин муунга тынчтык, бейпилдик тартуулаган аталардын эрдигин даңазалоо жана эскерүү максатында “Жеңиш ыры” аттуу сынак өткөрүлдү. 

Улуу Жеңиштин 70 жылдыгына карата 9-Май күнү Сузак районунун борбордук аянтында согушта курман болгондордун эстелигине гүлчамбарлар коюлуп, эскерүү иштери жүргүзүлөт. Ошондой эле Сузак районунда жашап жаткан Улуу Ата Мекендик согуштун 21 ардагерине 21 автоунаа белекке берилет.