Ишембиликтер боюнча өкмөттүн токтомун аткарбагандар калкка жарыяланат

Өкмөттүн буйругу менен быйыл 14-марттан 30-майга чейинки мөөнөттө министрликтер, ведомстволор, өкмөттүн ыйгарым укуктуу өкүлдөрү, жергиликтүү өз алдынча башкаруу органдары жер-жерлерде сел жана суу ташкындары коркунучунун алдын алуу иштерин жүргүзүүсү зарыл болчу. Бирок айрым жетекчилер бул буйрукка маани бербей жаткандыгы өкүнүчтүү. Бул тууралуу бүгүн, 1-майда Өзгөчө кырдаалдар министрлигинин басма сөз кызматынан билдиришти. Маалым болгондой, ӨКМ мындан ары жогорудагы буйрукту аткарбаган жетекчилерди, жергиликтүү бийлик башчыларын атайын фото жана видеорепортаждарды даярдоо аркылуу калкка жарыялап турууну чечти.

“Алгачкылардан болуп Лейлек районунун Исфана шаарындагы абал окурмандарга сунуш кылынат. Төмөндөгү сүрөттө Исфана шаарына кире бериштеги негизги көчөдөгү арыктардын тазаланбаган, казылбаган абалын фоторепортаж аркылуу калкка жарыялайбыз. Аталган көчөдө Лейлек райондук ооруканасы, турак жайлар, аскердик бөлүк жайгашкан. Бирок арыктар тазаланбай, акыр-чикирге толуп, суулар топтолуп, акпай турат”,- деп айтылат маалыматта.