Мамлекеттик чек ара кызматы Баткендеги окуянын чоо-жайын түшүндүрдү

30-апрелде Баткенде эки кыргыз жаранын барымтага алып, Тажикстандын аймагына өтүп кеткен тажик жарандары кыргыз жарандарынан 180 килограмм сымап сатып алууга аракет кылышкан. Бул тууралуу Кыргыз Республикасынын Чек ара кызматынын 1-майда тараткан маалыматында айтылат. Маалыматка таянсак, 30-апрелде эки адамды барымтага алган Тажикстандын тогуз жараны Кыргыз Республикасынын аймагына мыйзамсыз кирген.

“Баткен районунун Кара-Бак айылына тажик жарандары мыйзамсыз кирип, кыргыз жарандарынан сымап сатып алууга аракет кылышкан. Ошол учурда алар кыргыз чек арачыларын көрүп калышып, булардын ичинен эки тажик жараны айылдын эки тургунун күч менен унаасына салып алышып Тажикстанга кирип кетишкен. Ал эми качууга үлгүрбөй калган жети тажик жана үч кыргыз кармалган. Ошол замат кармалгандар УКМКнын Баткен облустук башкармалыгына өткөрүлүп берилди”,- деп айтылат маалыматта. Ал эми учурда алар окуя боюнча көрсөтмө берип жатышканы айтылды.