Америкалык мушкер Флойд Мейвезер атаандашы Мэнни Пакьяону упай айырмачылыгында утуп алды

Бүгүн, 3-майда АКШнын Лас-Вегас шаарында филиппиндик боксчу Мэнни Пакьяо менен америкалык Флойд Мейвезердин ортосунда беттеш орун алды. Мушкерлер өз ара WBA (Super), WBC жана WBO версиялары боюнча чемпиондук наамды талашышты. Беттеш 12 раундга созулуп, жыйынтыгында калыстар жеңишти бир ооздон Мейвезерге ыйгарышты (118:110, 116:112, 116:112).

Беттештин жүрүшүндө Мэнни Пакьяо атаандашына басым көрсөтүүгө аракет кылып, көбүрөөк сокку узатты.
Ф.Мейвезер коргонууда мыкты болуп, ийгиликтүү каршы чабуулдарды уюштуруп жатты. Боюнун жана колунун узундугу ага жардамга келип, атаандашын жакынкы аралыкка жолоткон жок. Чогулгандар Пакьяону катуу кыйкырык, сүрөөндөр менен колдоп, беттештин жыйынтыгына нааразычылыктарын жашырышкан жок. Бул күнү Мейвезер карьерасындагы жеңиштеринин санын 48ге жеткирди. Анын эсебинде тең чыгуу жана жеңилүү жок. Ал эми Пакьяо профессионалдык рингде алтынчы ирет жеңилүү ызасын тартты.

Кошумчалай кетсек, беттеш үчүн билеттердин баасы 150 миң долларга чейин жеткен. Мейвезер рингге чыкканы үчүн 150 миллион доллар алса, Пакьяого 100 миллион доллар тийди.