Нарын шаарында Улуу Жеңиштин 70 жылдыгына карата уюшулган Жеңиш эстафетасын кабыл алуу аземи өттү

Бүгүн, 4-майда Нарын шаарынын "Тянь-Шань" сейил багында Улуу Жеңиштин 70 жылдыгына арналган шериктеш өлкөлөрдүн тышкы чек араларын кыдырып өтүүчү Жеңиш эстафетасы Нарын шаарында кабыл алынды. Мэриядан кабарлашкандай, иш-чара алгач шаар, облус жана 2025-чек ара аскер бөлүгүнүн жетекчилигинин Өчпөс отко гүл, гирляндаларды коюусу жана Каракол шаарынан келе жаткан Жеңиш эстафетасын кабыл алуусу менен башталды.

Иш-чаранын салтанаттуу бөлүгү Улуу Ата Мекендик согуштун ардагери жана чек ара кызмат бөлүгүнүн кызматкерлеринин Нарын жеринен бир ууч топуракты Жеңиш эстафетасынын үлгүсү болгон гильзага салуусу жана аны Балыкчы шаарына узатуу менен аяктады. Улуу Жеңиштин 70 жылдыгына арналган эстафетаны узатуу иш-чарасына согуштун катышуучулары, ардагерлери, мекеме, ишканалардын кызматкерлери, шаар тургундары, 2025-чек ара аскер бөлүгүнүн өздүк курамы жана окуучулар катышты.