Боксчу Майк Тайсон 2-майда беттешкен Мейвезер менен Пакьяону "мушкер эмес, бизнесмендер" деп атады

2-майда “Кылымдын беттеши” деген аталышта өткөн Мейвезер-Пакьяо беттеши көпчүлүктүн купулуна толбой калганы спорт коомчулугунда айтылып жатат. Бул беттеш тууралуу оюн айткандардын катарына легендарлуу мушкер Майк Тайсон дагы кошулду. Чет элдик маалымат булактары кабарлагандай, Тайсон бул беттеште таң каларлык көрүнүш катталбаганын, учурда бокс такыр башка нукка бурулганын айтты.

“Мен рингде жырткыч болчумун. Атаандаштарымды нокаут менен утуп, алардын убайым тартуусун каалачумун. Азыр болсо бокс бизнеске айланды. Булар боксчу эмес, бизнесмендер”,- дейт М.Тайсон.

Кошумчалай кетсек, Флойд Мейвезер менен Мэнни Пакьяонун ортосундагы беттеште Мейвезер жеңишке жетишкен. Анда билеттердин баасы 150 миң долларга чейин жетип, Мейвезер рингге чыкканы үчүн 150 миллион доллар алды. Ал эми Пакьяого 100 миллион доллар убадаланган.