Бишкекте чек арачылар Жеңиш эстафетасын тосуп алышып, Ош жана Жалал-Абад облустарына жиберишти

Бүгүн, 5-майда Бишкек шаарындагы “Жеңиш” аянтында Жеңиш эстафетасына тиешелүү салтанаттуу иш-чаралар өткөрүлдү. Ага Улуу Ата Мекендик согуштун ардагерлери, КРнын жана Орусиянын аскер органдары, шаар тургундары жана башкалар катышып, Өчпөс отко гүл коюшту. Катышуучулар иш-чаранын жүрүшүндө 1941-1945-жылдары согушта курман болгондорду эскерип, 1 мүнөт аза күтүштү. Андан соң чек арачылар асманга катар ок чыгарышып, салтанатты аскердик оркестр коштоп турду. Келген коноктор Улуу Ата Мекендик согуштун кайталанбашын айтып, ардагерлердин ошол маалда көрсөткөн эрдиктерине дагы бир ирет таазим көрсөтүп жатышты.

Айта кетсек, кыргыз жергесинин аймагында Жеңиш эстафетасы учурда Каракол, Нарын, Балыкчы жана Бишкек шаарлары аркылуу өттү, кезек Ош жана Жалал-Абад шаарларында. Ал эми 7-майда Кыргыз Республикасынын чек арачылары Жеңиш эстафетасынын символун “Бор-Дөбө-унаа жол” көзөмөл-өткөрүү жайында Тажикстан Республикасынын чек арачыларына өткөрүп беришет.

Эскерте кетсек, Жеңиш эстафетасы Көз карандысыз Мамлекеттер Шериктештигинин тышкы чек аралары аркылуу өтөт жана анын жүрүшү Улуу Ата Мекендик согуштагы жеңиштин 70 жылдыгына арналган. Анын негизги максаты – СССР элдеринин Жеңишинин улуулугун даңазалоо, Улуу Ата Мекендик согуш жылдарындагы чек арачылардын баатырдык эрдиктерин түбөлүккө калтыруу.