Советтер Союзунун Баатыры Жумаш Асаналиевдин Минск шаарындагы эстелигине гүл коюлду

Улуу Ата Мекендик согуштун катышуучусу, Советтер Союзунун Баатыры Жумаш Асаналиевдин Беларустун Минск шаарындагы эстелигине гүл коюлду. Ага кыргыз мамлекетинин Беларустагы убактылуу ишенимдүү өкүлү Талант Султанов, Армения, Казакстан, Тажикстан, Түркмөнстан, Орусия мамлекеттеринин өкүлдөрү жана шаар тургундары катышты. Бул тууралуу Тышкы иштер министрлигинен билдиришти.

Талант Султанов өз сөзүндө Асаналиевдин эрдигин кыргыз жана беларусь эли эч качан унутпай турганын айтты.

Жумаш Асаналиев Ысык-Көл облусунун Ак-Суу районундагы Отуз-Уул айылында 1923-жылы туулган. Ал 1942- жылы аскерге чакырылып, 1-Балтика фронтунун 6-гвардиялык армиясынын 67-гвардиялык аткычтар дивизиясынын 199-полкунун пулемётчусу болгон. 1944-жылдын 24-июнунда Белоруссиянын Батыш Двина дарыясы аркылуу Лабейка айылынын тушунда пулемёту менен фашисттерди артка кайтарган.