Республикалык олимпиадалык резервдеги окуу жайында Улуу Ата Мекендик согуштун ардагерлерине концерт тартууланды

Улуу Жеңиштин 70 жылдыгына карата Бишкек шаарындагы Шералы Сыдыков атындагы Республикалык олимпиадалык резервдеги окуу жайында концерттик программа болуп өттү. Дене тарбия жана спорт мамлекеттик агенттигинен 8-майда кабарлашкандай, ага Улуу Ата Мекендик согуштун ардагерлери, окуу жайдын сыймыктуу аксакалдары катышты. Аларга окуу жайдын жетекчиси Мурат Кыбраев тарабынан куттуктоо сөздөрү айтылып, ардагерлерге баалуу белектер тапшырылды.

Окуу жайга конок катары чакырылган 99 жаштагы согуш ардагери Салымбай Акматов сөз сүйлөп, башынан өткөргөн таасирдүү окуялары менен бөлүшүп, жер жүзүндө ар дайым тынчтык өкүм сүрүшүн тилеп, жаштарды эли-жерин сүйүүгө чакырды. Бул куттуктоо сөздөрүнөн кийин салтанат залында окуучулар тарабынан уюштурулган концерттик программа тартууланды. Иш-чарада аскердик ырлар ырдалып, окуу жайдын таланттуу окуучулары сахналаштырылган көрүнүштөрдү, ыр-бийлерди аткарышты.

Концерттик программадан кийин ардагерлер үчүн сый-тамак уюштурулуп, дасторкон үстүндө маектешүү болду.