Ош. Улуу Ата Мекендик согуштун ардагерлерине мааракелик медалдар тапшырылды

Бүгүн, 8-майда Ошто Улуу Ата Мекендик согуштун 26 ардагерине президент Алмазбек Атамбаевдин жарлыгына ылайык “70 жылдык” мааракелик медалдарын ажонун атынан Ош шаарынын мэри Айтмамат Кадырбаев тапшырды. Бул тууралуу Ош шаарынын мэриясынын басма сөз кызматынан билдиришти. 

Маалым болгондой, салтанаттуу иш-чарага Улуу Ата Мекендик согуштун ардагерлери, Ош шаардык кеңешинин депутаттары, Кытай Эл Республикасынын Ош шаарындагы консулу У Ин Цин катышты. 

Шаар мэри Кадырбаев мааракелик төш белгини ардагерлерге сый-урмат менен тагып жатып: “Урматтуу ардагер ата-апалар өз өмүрлөрүн тобокелге салып, курмандыкка чалып, бизге жана бүт дүйнөгө эркин жана көз карандысыз жашоону камсыздашты. Биз, келечек муундар, ардагерлерибиздин эрдиктерин эч качан унутпашыбыз керек”,- деп баса белгиледи.