Ысык-Көл облусунда 240 жоокер аскердик ант берди

Салтанаттуу иш-чарага өкмөттүн облустагы өкүлү Эмилбек Каптагаев, Мамлекеттик чек ара кызматынын төрагасынын орун басары, полковник Таалайбек Усубалиев, жергиликтүү бийлик органдарынын өкүлдөрү, ардагерлер жана жоокерлердин туугандары катышты.

Усубалиев өз сөзүндө ар бир жаш жаран үчүн чек арада кызмат өтөө өлкө алдында чоң жоопкерчилик экенин белгиледи. “Мекенге кызмат кылуу – эр-азаматтын милдети. Биз мекенибиздин чектерин кайтаруу менен бирге өлкөбүздүн эгемендүүлүгүн жана биримдигин коргойбуз. Андыктан ар бир чек арачы чек арада кыраакылык менен кызмат өтөп, мамлекеттик чек араны коргоо жана кайтаруу өлкөдө тынчтыкты жана бакубаттуулукту камсыздоого мүмкүнчүлүк берерин унутпашы керек”,- деди ал. 

Аскердик ант берген жоокерлерди иш-чаранын коноктору да куттукташты.

Жаш жоокерлер окуу курсунан өтүү убагында мамлекеттик чек араны кайтаруу боюнча теориялык билим алышып, ок атуу, саптык, тактикалык даярдыктардын негиздерин окушту.

Аскердик ант берген жаш жоокерлер мындан ары республиканын түндүк аймагындагы чек ара заставаларында кызмат өтөшөт.