Ош шаарынын салык төлөөчүлөрүнө ыңгайлуу эки көчмө касса ачылды

Бүгүн, 13-май күнү Ош шаарынын салык төлөөчүлөрүнө ыңгайлуу 2 көчмө кассанын салтанаттуу ачылыш аземи болду. Бул тууралуу шаардык мэриянын басма сөз кызматынан билдиришти. 

Маалым болгондой, иш-чарага Ош шаарынын биринчи вице-мэри Замирбек Аскаров, КРнын Мамлекеттик салык кызматынын Ош шаары боюнча башкармалыгынын өкүлдөрү жана ишкерлер катышышты.

Биринчи көчмө касса Навои көчөсү-11-А дарегинде, экинчиси “Кудайберди” автотетик базарында жайгашкан.

“Бул касса бөлүмдөрүнүн ачылышынын негизги максаты салыктарды жана камсыздандыруу төгүмдөрүн төлөө үчүн салык төлөөчүлөргө ыңгайлуу шарттарды түзүү болуп эсептелет. Жаңы ачылган көчмө кассалар калаа тургундары кеңири колдонгон базар, автобекеттерге жакын болуп, жарандарга бир топ жеңилдиктерди жаратат”,- делет маалыматта.

Айта кетсек, буга чейин КРнын Мамлекеттик салык кызматынын Ош шаары боюнча башкы башкармалыгы банктардын биринде салык төлөмдөрүн кабыл алуу үчүн кошумча бөлүмдөрдү ачуу мүмкүнчүлүгүн карап көрүү өтүнүчү менен кайрылган эле.