Ош облусунун медреселеринде билим берүү стандарттарына талап күчөтүлөт

Ош облусунун медреселеринде билим берүү стандарттарына талап күчөтүлөт. Муну Ош облустук мусулмандар казыятынан билдиришти. 

Белгилүү болгондой, кечээ, 13-майда Ош облустук казыятында облус аймагындагы медреселердин мүдүрлөрү 2014-2015-окуу жылы боюнча жасалган иштеринин жыйынтыктарын чыгарышты. Мүдүрлөр медреселердин окуу пландары, материалдык-техникалык базалары, санитардык-гигиеналык талаптар жана окуучулар менен окутуучулардын абалы боюнча сөз кылышты. Мындан сырткары муфтият тарабынан бекитилип берилген мамлекеттик илимдерди окутуунун стандарттарынын аткарылышы жана жайкы каникулга чыгаруунун бирдей болуусу талкууга алынды. Жыйын соңунда облус казысы Ниязали ажы Арипов медреселердеги окутуу программаларында диний сабактардан сырткары мамлекеттик билим берүү стандарттарынын сакталышын белгиледи. Ошондой эле кошумча сабактар боюнча атайын мугалимдер менен камсыздоо жана диний жактан окутуучулардын акыйда маселелерин көзөмөлгө алуу тапшырмасын койду.

Эскерте кетсек, май айынын соңунда медресе окуучулары каникулга чыгарылып, сентябрь айында жаңы окуу процесси башталат.