Алмазбек Атамбаев Жеңиштин жаш мураскерлеринин парадынын катышуучуларына ыраазычылык билдирди

Бүгүн, 14-майда президент Алмазбек Атамбаевдин атынан Жеңиштин жаш мураскерлеринин парадынын катышуучуларына ыраазычылык каттар тапшырылды. Иш-чара Кожомкул атындагы Спорт Ордосунда өткөнүн президенттик аппараттан билдиришти.

“Борбордук “Ала-Тоо” аянтында масштабдуу жана театрлаштырылган оюн-зоокту – Жеңиштин жаш мураскерлеринин парадын уюштурууга жана өткөрүүгө катышканыңар үчүн чын дилимден ыраазычылык билдирем! Согуштун жана эмгектин ардагерлерине, бардык көрүүчүлөргө жана жалпы кыргыз мамлекетинин элине тартуулаган чоң майрамыңар үчүн ыраазычылык айтам! Силер Жеңиш күнү кыргыз жеринин тургундары үчүн ар дайым ыйык майрам болорун ачык көрсөттүңөр. Балдарыбыз келечекте дагы улуу муундагы адамдардын улуу эрдигин эч качан унутпасын далилдедиңер. Силер экономикада, маданиятта жана илимде жакшы иштериңер, жаңы жетишкендиктериңер, ачылыштарыңар менен кыргыз мамлекетинин даңкын чыгарасыңар деп ишенем. Баарыңарга чың ден соолук, бакыт-таалай жана жаңы ийгиликтерди каалайм!”- деп айтылат мамлекет башчынын ыраазычылык катында.

Окуучуларга ыраазычылык билдирүү иретинде жаштардын бий топторунун жана эстрада ырчыларынын катышуусу менен концерт тартууланды. 

Эске салсак, 2015-жылдын 4-майында Бишкек шаарынын “Ала-Тоо” аянтында окуучулардын масштабдуу театрлаштырылган Жеңиштин жаш мураскерлеринин парады өткөрүлүп, Улуу Ата Мекендик согуштагы Жеңиштин 70 жылдыгына арналган салтанаттар башталган.

Парадга 6 миңден ашуун окуучу катышкан.