Ош. 2015-жылдын мыкты мугалимине унаа берилди

Кечээ, 14-майда Ош шаарында “Жылдын мыкты мугалими-2015” сынагынын финалы өткөрүлдү. Бул тууралуу шаардык мэриянын басма сөз кызматынан билдиришти. Маалым болгондой, сынакка 36 окутуучу катышып, алардын 15и 2-турга өтүп, 7си финалга чыккан. Мугалимдер окуу-методикалык материалдар көргөзмөсүн уюштуруу, өзүнүн кесиби жөнүндө айтып берүү, окутуучу кезиккен ыңгайсыз абалдардан туура чыгып кетүү боюнча суроолорго жооп берүү, мастер-класс, блиц-турнир жана хобби сынактарынан өздөрүн сынашты. Салтанаттуу иш-чаранын жеңүүчүлөрүн шаар мэри Айтмамат Кадырбаев сыйлады.

Сынактын жыйынтыгы менен баш байгени №5-мектептин мугалими Эльвиза Нарынбаева утуп, белекке Daewoo Matiz үлгүсүндөгү унаанын ачкычын алды. Ал эми 1-орунду №50-мектептин мугалими Ханзаада Маатова, 2-орунду №7-мектепте иштеген Элиза Рыскулова жана 3-орунду №41-мектептин окутуучусу Нигора Худоярова жеңип, баалуу белектерге ээ болушту. Мындан тышкары жарым финалга өткөн 8 мугалим Ардак грамоталар менен сыйланышты.