Ошто медицина жаатында адистикке ээ болгон жаштар үчүн бош орундар жарманкеси уюштурулду

14-майда Ош мамлекеттик университетинде Ош, Жалал-Абад, Баткен облустары боюнча медициналык мекемелердин жетекчилери менен медицина факультетинин бүтүрүүчүлөрүнүн, клиникалык ординаторлорунун, врач-интерндердин жолугушуусу болуп өттү. “Бош орундар жарманкеси-2015” иш-чарасынын алкагында жаңы гана адистикке ээ болгон жаштарга жумуш ордулары сунушталды. Окуу жайдан кабарлашкандай, анда Ош шаарында 2 дарыгер-лаборант, 10 үй-бүлөлүк дарыгер, 10 педиатр, 2 неонатолог, 3 инфекционист, 2 дарыгер-анестезиолог, 2 статист, 2 рентгенолог, 1 лаборант, 4 фельдшер, 2 психиатр үчүн бош орундары бар экендиги айтылды. Чоң-Алай, Алай, Араван, Өзгөн, Кара-Суу, Ноокат райондору боюнча да бош орундардын саны жарыяланып, бүтүрүүчүлөрдүн тандоосуна коюлду.  

Жолугушууга Ош шаардык мэриясынан, өкмөттүн Ош, Жалал-Абад облустарындагы ыйгарым укуктуу өкүлчүлүктөрүнөн өкүлдөр, Ош облустар аралык бириккен клиникалык ооруканасынын директору Шайырбек Сулайманов, Ош шаардык клиникалык оорукананын башкы дарыгери Равшан Маметов жана башка Ош, Жалал-Абад, Баткен облустарындагы облустук, шаардык, райондук бир топ саламаттыкты сактоо мекемелеринин башкы дарыгерлери, координаторлору катышышты.