Жогорку Кеңештин депутаттары Жогорку Нарын ГЭС каскадынын курулушу менен таанышып чыгышат

Жогорку Кеңештин Эл аралык иштер боюнча комитети 17-18-май күндөрү Нарын облусунда парламент тарабынан ратификацияланган эл аралык келишимдердин алкагында ишке ашырылып жаткан ири инвестициялык долбоорлорду талкуулоо үчүн көчмө жыйын өткөрөт. Маалыматты 15-майда ЖКнын басма сөз кызматы билдирди. 

Көчмө жыйында депутаттар 17-майда Кемин районундагы "Датка-Кемин" жогорку чыңалуудагы электр өткөргүч чубалгыларынын тартылышы жана "Кемин" электр көмөкчү чордонунун курулушу менен таанышат. Жогорку Нарын ГЭС каскадынын курулушун көрүшмөкчү.

Комитет мүчөлөрү Бишкек-Ош унаа жолунун Боом капчыгайындагы бөлүгүнүн абалы, өлкөнүн эки аймагын бириктире турган стратегиялык багыттагы Түндүк-Түштүк альтернативдүү жолунун Жумгал районунун Кызыл-Жылдыз – Арал жол тилкесинде жүрүп жаткан курулуш иштери менен да таанышары айтылды.    

Тармактык комитеттин 18-май күнү Нарын шаарында өтө турган жыйынында облустагы социалдык-экономикалык жагдайы, жергиликтүү калктын көйгөйлүү маселелери талкууга алынып, аларды чечүү жаатында чараларды көрүү жана чечүү боюнча бир катар чечимдер кабыл алынып, мамлекеттик органдар менен мекемелерге тиешелүү тапшырмалар берилмекчи.