Үй камагына алынган Карганбек Самаковго сот интернет аркылуу сүйлөшүүгө да тыюу салды

2 айга үй камагына алынган депутат Карганбек Самаковго интернет жана телефон аркылуу сүйлөшүүгө тыюу салынды. Бул тууралуу Бишкек шаарындагы Октябрь райондук сотунун 17-майдагы кабыл алган чечиминде айтылганын Жогорку Соттун басма сөз кызматы 18-майда SUPER.KG порталына тастыктады.

Депутат Карганбек Самаковго үй камагы учурунда жана тергөө мөөнөтү бүткөнгө чейин төмөнкүлөрдү жасоого тыюу салынат:

- Бишкек шаарынын Октябрь районунун аймагынан тышка чыгууга;

- белгисиз адамдар менен эркин сүйлөшүүгө;

- почта, интернет жана телефон аркылуу корреспонденция жөнөтүүгө;

- митинг жана маалымат жыйындарын өткөрүүгө;

- жашаган жеринен саат 20:00дөн 08:00гө чейин чыгууга.

Айта кетсек, Самаковго Чүйдүн Кара-Жыгач, Байтик жана Лебединовка айыл аймактарында 262 гектар жер тилкесин 2007-2008-жылдары мыйзамсыз трансформациялоо (мисалы: дыйканчылыкка деп бөлүнгөн жерди үй салууга боло тургандай категорияга которуу) кылмышына айыпталып кармалып, 15-майда УКМКнын тергөө абагына камакка алынган. 17-майда бул ишти Октябрь райондук соту карап, аны 2 айга үй камагына чыгарды.