Президент жазык-аткаруу тутумунун органдарына жана мекемелерине жарандарды кабыл алуу шарттарын жакшыртуу жөнүндө мыйзамга кол койду

Президент Алмазбек Атамбаев “Кыргыз Республикасынын жазык-аткаруу тутумунун органдарынын жана мекемелеринин катардагы жана жетекчи курамынын кызмат өтөөсү жөнүндө” КРнын мыйзамына өзгөртүүлөрдү жана толуктоолорду киргизүү тууралуу” мыйзамга кол койду. Бул тууралуу 19-майда президенттик аппараттан билдиришти.

Бул мыйзам Жогорку Кеңеш тарабынан 2015-жылдын 15-апрелинде кабыл алынган.

Мыйзамдын максаты жазык-аткаруу тутумунун органдарына жана мекемелерине жарандарды кабыл алуу шарттарын жакшыртуу болуп саналат.

Бул максатты ишке ашыруу үчүн өзгөртүүлөр киргизилип, аларга ылайык:

1) кызматка кабыл алууда талапкерлерге 1,5 жыл иш тажрыйбасы керек деген талап алынып салынат;

2) анык аскердик кызматты өтөгөн же үй-бүлөлүк абалына байланыштуу негиздер боюнча альтернативдик (аскерден тышкаркы) кызматтан өткөн жарандар гана кызматка кабыл алынышат;

3) аскердик жана альтернативдик кызмат өтөгөндүгүнө карата талаптар аялдарга жайылтылбайт;

4) ортоңку жана улук жетекчи курамдагы кызмат ордуна келишимдик негизде кызматка кабыл алынчуларга чектөөлөр белгиленет (салыштырмалуу таблица тиркелет).

Мыйзам расмий жарыяланган күндөн тартып күчүнө кирет.